D ´Wältnomadä bitted zum Tanz

Mit irne farbigä Flamenco-Chleider und irem autäntischä Tschipsi-Schtiil sind d’Casino Gitano, di waarschindli uuffälligscht Erschiinig, womer i dä letschtä Jahre uf dä Bühnä und Strassä vo Berlinhät chönä xee. Zu däm kunterbuntä gross-stettischä Tschipsi-Klän ghöräd underdessä 16 Musiker und Tänzer, und d’Gruppä wachst öppä so beschtändig wie iri Fängmeind. Öb im Berliner SO36 mit äm Fermin Muguruzza und dä Banda Bassotti, im RAW-Tämpel, im Tacheles, uf äm Fusionfestival mit Amparanoia, i dä Arena in Wien odär uf irär eigenä Record-Release-Party im Chesselhuus: d’Casino Gitano mit irne charismatischä und mitriisändä Sängär Thierry und Ivanuschka schaffäds immer wider, bi irem ebeso bunt gmischtä Publikum Begeischterigsschtürm z’entfachä.

Casino Gitano träged dä globali Gedankä scho i irem Herzä, schliässlich sind sie i dä multikulturellä Metropole Berlin entstandä. Fröhlich bedienäd sie sich us äm folkloristischä Fundus verschidnigschter Wältkulturä, vom Balkan über Andalusiä bis Rio de Janeiro. Sie schaffed debi öppis Nöis, Öppis wo losglöst vo jedärä Tradition d’Generationä und au di verschidnigä Szene tuet vereinä. Tschipsi-Swing, Balkanfolklorä, äs Bizli Polkaund Tango, au än Huuch vo Flamenco –d’Casino Gitano chömed ganz ohni Rockelemänt, Elektronik oder verfälschändi Mischige us. Äs isch di füürigi und bewegändi Seelä, irä eigentlichi Chern, wo d’Casino Gitano repräsentieräd- Flamencore.

Ires erscht Album „la mentira de los Payos“ isch, längscht überfällig, im dezämbär 2003 usechoo. Produziert häts dä Thomas Stern, är hät scho erfolriich mit Einstürzende Neubauten und dä Meret Becker zämä gschaffet.

Jetz isch es a dä Ziit d’Wält z’bereise, wies sich für ächti Gitanos ghört. Im Mai gaats über d’Schwiiz nach Italiä, im Auguscht staat Holland und Skandinaviä uf äm Programm und im Septämbär sind Uuftritt in Moskau und Petersburg planet.

Spannend bliibt d’fraag nach dä waare Härkunft vo dä Gitanos. So vill wird verraatä: dä einzig ächti Roma isch dä Sänger, Akkordeonischt und Entertainer Thierry. Di steppändä Zwilling Carmen und Cristina und d’Sängeri Ivanuschka sind us Spaniä, d’Giigeri Hanna Skowitschka isch Schwedin. Me seit Sancho und Pancho stammid us Andalusiä und me munklet dä Pablo Luzando seg früenär än polnische Meischter am Kontrabass xii, aber wer weiss scho gnauers über dä Tonio Gonzales oder gar dä Frank sin Otra...

Doch spötischtens uf dä Bühni zeigt sich, wie vill Sangre Gitana i dä Aadere vo denä Wältnomadä flüüst, dänn sie wüssäd, wiämär ä Fiesta fiiräd: spontan, wild und übermüätig.

Quelle http://www.soundlift.com/casinogitano